Celebrations

六月十一日係我哋結婚三週年記念亦都係亞B出世三個月。家陣有咗亞B去邊都要諗過度過，唔洗等位，要坐得闊落，近近哋最好！我哋去咗老公朋友所開嘅餐廳Lime到食。Yummy!

SaSa.com

剛剛响香港莎莎網上訂咗啲化妝品同瘦身用品。通常我都會訂啲加拿大冇得賣嘅產品同牌子。今次發覺原來有啲貨品居然平過响加拿大買，例如一支Lancome Blanc Expert Neurowhite X3美白泡沫乳，size一樣，加拿大賣成加幣$52仲要再加13%稅，莎莎網賣大約加幣$36，平成$20(約$140港幣)! 而一支Biotherm Pore Reducer就平過响加拿大買$5! 如果响莎莎網買滿USD$100就免郵費，其實買吓買吓話咁易就過啦！
好期待快啲收到啲貨，可以試新嘢！

Fresh Made Waffle Cone

今日一家大細去mall行。老公話肚餓要飲milkshake，我就揀食雪糕。比錢嗰陣個服務員同我講話個雪糕筒係fresh made仲暖添架！我心諗佢懶醒比個暖嘅cone咁啲雪糕咪好快溶，幾fresh都冇用啦！一如我所料行咗幾步啲雪糕响個cone底流出嚟，用幾張紙巾都包唔住，最後都滴咗响件衫上！唉。。。

尿片

我住嗰區兩個星期先收一次垃圾，而每個星期都收recycle同organic嘅物品。好彩紙尿片係列入organic嗰欄，如果唔係成屋臭氣熏天！我個仔閒閒哋一日用十條尿片，一個禮拜就用上七十條，以下就係其中一袋一星期貯埋嘅尿片。

正常嚟講你唔會幫其他人抹屎抹尿，當你做咗人亞媽亞爸時幾污糟嘅嘢都會做，父母真係偉大！

腳印

亞B出咗世之後，去街唔可以去得遠，又唔可以去得耐。因為每兩個半至三個鐘就要餵奶，加埋換尿片、餵奶、掃風都要成粒鐘。所以都唔想周圍去！
今個long weekend冇去邊，都只係去吓行mall、買吓餸。最特別就係幫亞B整石膏模，用舊軟膠搓圓，再壓落佢隻手仔同腳仔。其實一啲都唔易，如果佢啲手指仔腳指仔郁咗或印得唔夠深嘅話，就要再壓過！跟住倒石膏漿入個軟膠模到等半個鐘，個石膏模就成形。我就再用即棄指甲挫磨返滑個邊。大功告成！

仔仔都上blog

當我想重新寫blog時，老公提意同亞B整返個blog。點知亞B個blog仲多update過我！我都要勤力啲先得啦！
呢個就係亞B個blog :http://jonathan.stanleyhui.com/
歡迎參觀！

Relaunch

停咗冇update blog 成年幾，賴工作忙，賴大肚容易倦要多休息！
家陣放緊產假，日日响屋企呆，終於滴起心肝重新再寫blog！